Frå Kristi himmelfartsdag til St. Hans går aksjonen Saman som kyrkje i heile verda. Aksjonen starta som eit grasrotinitiativ under pandemien, og vert no gjennomført for tredje gong. Den har vore eit viktig bidrag for våre systerkyrkjer i ei krevjande tid, og vil framleis vere det. For sjølv om pandemien har gått inn i ei ny fase her heime, så er verkelegheita framleis ei heilt anna i store deler av verda.
- Det er mange rundt om i verda som trenger oppmerksemda vår, hjelpa vår og støtta vår. Det er naturleg at vi har vore opptatte av Ukraina, som er i vårt nærområde, men Saman som kyrkje er eit godt høve til å no rette blikket også mot andre som trenger merksemda vår. Krigen i Ukraina pregar verda på ulike måtar, mellom anna med påfølgande matmangel og ytterlegare naud.
- Mitt bodskap inn mot Saman som kyrkje i heile verda, er at vi kan tenke «både og», og ikkje «anten eller», seier biskop Ingeborg Midttømme om solidaritetsaksjonen.
22 påmeldte frå Møre
Aksjonen er tenkt å vere eit supplement og ei anledning til å sette fokus på eige misjonsprosjekt. Så langt er 22 kyrkjelydar i Møre påmeldt til aksjonen, og det er enno ikkje for seint å melde seg på!
Gjennom ulike tiltak vil kyrkjelydane løfte fram sitt lokale misjonsengasjement desse vekene.
Asbjørg Oksavik Sve fortel frå Skodje og Ørskog, dei to sokna har begge misjonsavtale med NMS, og støttar prosjekt i både Estland, England og Etiopia. Under friluftsgudstenesta på Tøsse, mellom Skodje og Ørskog, er det i år Skodje som er ansvarleg og takkofferet går til Estland, Skodje sitt prosjekt.
Sølvi Irene Ulvestad kan fortelje at Spjelkavik alt er i gang med aksjonen, og delte informasjon om kyrkjelyden sine to misjonsprosjekt på kyrkjekaffien på Hatlehol sist søndag. Spjelkavik har misjonsavtale med NMS, og støttar prosjektet Sat-7 og Midt-Østen, og dei har avtale med Himalpartner om arbeidet i Nepal. Sølvi var på inspirasjonstur til Nepal i påska, og kunne dele heilt ferske erfaringar frå arbeidet der.
Meld på din kyrkjelyd her:
Om kyrkjelyden ikkje har meldt seg på, men ynskjer å gjere det, så kan de gå inn på nettsida www.kirken.no/sammen.